અમેરિકામાં થઈ હતી ગુજરાતી મહિલાની હત્યા
મે 2026ના મહિનામાં અમેરિકામાં પણ ગુજરાતી મહિલાની હત્યા થઈ હતી. 23 મે, 2026ના રોજ અમેરિકાના વર્જિનિયામાં રહેતા અને સ્ટોરમાં નોકરી કરતા મૂળ મહેસાણા જિલ્લાના જંત્રાલ ગામના વતની મેઘનાબેન પટેલની બુકાનીધારી અજાણ્યા યુવકે ગોળી મારીને હત્યા કરી દીધી હતી. છેલ્લા 10 વર્ષથી પોતાના પરિવાર સાથે અમેરિકામાં સ્થાયી થયેલા મેઘનાબેન ઉપેન્દ્રભાઈ પટેલ 23 મેના શનિવારે સવારે રોજિંદા ક્રમ મુજબ પોતાના સ્ટોર પર હાજર હતા. આ દરમિયાન એક અજાણ્યો યુવક મોઢે બુકાની બાંધી સ્ટોરમાં ધસી આવ્યો હતો. સ્ટોર પર હાજર મેઘનાબેન પટેલે સુરક્ષાના કારણોસર આ યુવકને પોતાના મોઢા પરથી બુકાની હટાવવા માટે જણાવ્યું હતું. જે બાદ યુવાને ધડાધડ ફાયરિંગ કર્યું હતુ. આ હત્યામાં ચોંકાવનારો ખુલાસો એ થયો છે કે, આરોપીએ પહેલાં પોતાના સાવકા પિતાની ગોળી મારી નિર્મમ હત્યા કર્યા બાદ મેઘનાબેન પટેલને મોતને ઘાટ ઉતાર્યા હતા અને ત્યારબાદ સાયકો કિલરે પોતાના લમણે બંદૂક મૂકીને ફાયરિંગ કરી આપઘાત કરી લીધો હતો.
